اے تو کہ روز و شب کو مہ و آفتاب دے

اے تو کہ روز و شب کو مہ و آفتاب دے

برسوں کی جاگتی ہوئی آنکھوں کو خواب دے

میں وہ کہ نقش گر ترے ارض و سما کا ہوں

تو وہ کہ مجھ کو دونوں جہاں کا عذاب دے

سنتے ہیں اس کے ہاتھ قلم کر دیئے گئے

جو شخص پتھروں کو نگینوں کی آب دے

میں نے تو تن بدن کا لہو نذر کر دیا

اے شہریار تو بھی تو اپنا حساب دے

کس دل میں بو رہے ہو تمنا کے بیج تم

یہ دکھ کی سر زمین تو کالے گلاب دے

میں سر بکف ہوں تیغ ستم گر کے سامنے

اب اس سے بڑھ کے کیا کوئی اس کو جواب دے