ہر اک مکاں میں جلا پھر دیا دوالی کا

ہر اک مکاں میں جلا پھر دیا دوالی کا

ہر اک طرف کو اجالا ہوا دوالی کا

سبھی کے دل میں سماں بھا گیا دوالی کا

کسی کے دل کو مزا خوش لگا دوالی کا

عجب بہار کا ہے دن بنا دوالی کا

جہاں میں یارو عجب طرح کا ہے یہ تیوہار

کسی نے نقد لیا اور کوئی کرے ہے ادھار

کھلونے کھیلوں بتاشوں کا گرم ہے بازار

ہر اک دکاں میں چراغوں کی ہو رہی ہے بہار

سبھوں کو فکر ہے اب جا بجا دوالی کا

مٹھائیوں کی دکانیں لگا کے حلوائی

پکارتے ہیں کہ لالہ دوالی ہے آئی

بتاشے لے کوئی برفی کسی نے تلوائی

کھلونے والوں کی ان سے زیادہ بن آئی

گویا انہوں کے واں راج آ گیا دوالی کا