کچھ قوس قزح سے رنگت لی کچھ نور چرایا تاروں سے

کچھ قوس قزح سے رنگت لی کچھ نور چرایا تاروں سے

بجلی سے تڑپ کو مانگ لیا کچھ کیف اڑایا بہاروں سے

پھولوں سے مہک شاخوں سے لچک اور منڈووں سے ٹھنڈا سایہ

جنگل کی کنواری کلیوں نے دے ڈالا اپنا سرمایہ

بد مست جوانی سے چھینی کچھ بے فکری کچھ الہڑپن

پھر حسن جنوں پرور نے دی آشفتہ سری دل کی دھڑکن

بکھری ہوئی رنگیں کرنوں کو آنکھوں سے چن کر لاتا ہوں

فطرت کے پریشاں نغموں سے اک اپنا گیت بناتا ہوں

فردوس خیالی میں بیٹھا اک بت کو تراشا کرتا ہوں

پھر اپنے دل کی دھڑکن کو پتھر کے دل میں بھرتا ہوں