barshikāl-e-girya-e-āshiq hai dekhā chāhiye

barshikāl-e-girya-e-āshiq hai dekhā chāhiye

khil ga.ī mānind-e-gul sau jā se dīvār-e-chaman

ulfat-e-gul se ġhalat hai dāva-e-vārastagī

sarv hai bā-vasf-e-āzādī giraftār-e-chaman

saaf hai az bas-ki aks-e-gul se gulzār-e-chaman

jānashīn-e-jauhar-e-ā.īna hai ḳhār-e-chaman

hai nazākat bas ki fasl-e-gul meñ me.amār-e-chaman

qālib-e-gul meñ Dhalī hai ḳhisht-e-dīvār-e-chaman

terī ārā.ish kā istiqbāl kartī hai bahār

jauhar-e-ā.īna hai yaañ naqsh-e-ehzār-e-chaman

bas ki paa.ī yaar kī rañgīñ-adā.ī se shikast

hai kulāh-e-nāz-e-gul bar tāq-e-dīvār-e-chaman

vaqt hai gar bulbul-e-miskīñ zuleḳhā.i kare

yūsuf-e-gul jalva-farmā hai ba-bāzār-e-chaman

vahshat-afzā girya-hā mauqūf-e-fasl-e-gul 'asad'

chashm-e-dariyā-rez hai mīzāb-e-sarkār-e-chaman

barshikal-e-girya-e-ashiq hai dekha chahiye

khil gai manind-e-gul sau ja se diwar-e-chaman

ulfat-e-gul se ghalat hai dawa-e-warastagi

sarw hai ba-wasf-e-azadi giraftar-e-chaman

saf hai az bas-ki aks-e-gul se gulzar-e-chaman

jaanashin-e-jauhar-e-aina hai KHar-e-chaman

hai nazakat bas ki fasl-e-gul mein meamar-e-chaman

qalib-e-gul mein Dhali hai KHisht-e-diwar-e-chaman

teri aaraish ka istiqbaal karti hai bahaar

jauhar-e-aina hai yan naqsh-e-ehzar-e-chaman

bas ki pai yar ki rangin-adai se shikast

hai kulah-e-naz-e-gul bar taq-e-diwar-e-chaman

waqt hai gar bulbul-e-miskin zuleKHai kare

yusuf-e-gul jalwa-farma hai ba-bazar-e-chaman

wahshat-afza girya-ha mauquf-e-fasl-e-gul 'asad'

chashm-e-dariya-rez hai mizab-e-sarkar-e-chaman