hai vasl hijr ālam-e-tamkīn-o-zabt meñ

hai vasl hijr ālam-e-tamkīn-o-zabt meñ

māshūq-e-shoḳh o āshiq-e-dīvāna chāhiye

us lab se mil hī jā.egā bosa kabhī to haañ

shauq-e-fuzūl o jur.at-e-rindāna chāhiye

āshiq naqāb-e-jalva-e-jānāna chāhiye

fānūs-e-sham.a ko par-e-parvāna chāhiye

paidā kareñ dimāġh-e-tamāshā-e-sarv-o-gul

hasrat-kashoñ ko sāġhar-o-mīnā na chāhiye

dīvānagāñ haiñ hāmil-e-rāz-e-nihān-e-'ishq

ai be-tamīz ganj ko vīrāna chāhiye

saaqī bahār-e-mausam-e-gul hai surūr-baḳhsh

paimāñ se ham guzar ga.e paimāna chāhiye

jaada hai yaar kī ravish-e-guftugū 'asad'

yaañ juz fusūñ nahīñ agar afsāna chāhiye

hai wasl hijr aalam-e-tamkin-o-zabt mein

mashuq-e-shoKH o aashiq-e-diwana chahiye

us lab se mil hi jaega bosa kabhi to han

shauq-e-fuzul o jurat-e-rindana chahiye

aashiq naqab-e-jalwa-e-jaanana chahiye

fanus-e-shama ko par-e-parwana chahiye

paida karen dimagh-e-tamasha-e-sarw-o-gul

hasrat-kashon ko saghar-o-mina na chahiye

diwanagan hain hamil-e-raaz-e-nihan-e-'ishq

ai be-tamiz ganj ko virana chahiye

saqi bahaar-e-mausam-e-gul hai surur-baKHsh

paiman se hum guzar gae paimana chahiye

jada hai yar ki rawish-e-guftugu 'asad'

yan juz fusun nahin agar afsana chahiye