رقصِ عشق

ہوا کے دوش پر جیسے سمندر رقص کرتا ہے

زمین دل پہ جذبوں کا سخن ور رقص کرتا ہے

فنا کی جستجو میں زندگی بھر در بدر ہو کر

کوئی آب حیات عشق پی کر رقص کرتا ہے

خیال دنیا داری کی کشش اور قید سے باہر

لگن میں ڈوب جائے تب قلندر رقص کرتا ہے

جو مثل قیس صحرا میں نکل جائے جنوں لے کر

وہ کاسہ ہاتھ میں پکڑے برابر رقص کرتا ہے

کبھی ایسا بھی ہوتا ہے کہ تاج و تخت کی خاطر

بھلا کر غیرت شاہی سکندر رقص کرتا ہے

کبھی یہ تخت چھڑوائے کبھی تیشے بھی چلوائے

کبھی آشفتگی میں عشق شب بھر رقص کرتا ہے

اگرچہ دونوں انساں ہیں مگر تقسیم تو دیکھیں

براہمن حکم دیتا ہے تو شودر رقص کرتا ہے

کسی کے ماس کو یہ عشق جلتی آگ پر رکھے

کبھی دریا میں اک کچے گھڑے پر رقص کرتا ہے

کبھی رب کی اطاعت میں چھری کی زد میں آ جائے

کبھی عاشق یہاں آتش کے اندر رقص کرتا ہے

کسی کی جیت پر بھی زندگی آنسو بہاتی ہے

کسی کی ہار پر اُس کا مقدر رقص کرتا ہے

انا الحق کا کبھی نعرہ کبھی ہے عشق سولی پر

برہنہ سر کبھی نوک سناں پر رقص کرتا ہے

خمیدہ سر ہو کوئی سامنے جب اپنے ساقی کے

خمستاں جھومتا ہے اور ساغر رقص کرتا ہے

جو دل میں عشق احمد (ﷺ) ہو زباں پر لا الہ انجم

مقابل ہو اگر پتھر تو پتھر رقص کرتا ہے