ابو جان کی سالگرہ پر

تو کہ اس گھر کا چمکتا ہوا روشن تارا اپنی تابش میں جو سورج سے سوا رہتا ہے

چشم بینا سے تو دیکھا نہیں تجھ کو لیکن تیرا پیکر میرے سینے میں سجا رہتا ہے

زینتِ حسنِ چمن تیرے گھنے سائے میں ہم زمانے کی کڑی دھوپ سے بچ جاتے ہیں

ہم تو مٹ جاتے شب و روز کے ہنگاموں میں ہم تری ذات سے جینے کا ہنر پاتے ہیں

تو نے جو درد اٹھائے ہیں ہماری خاطر آج بھی وہ تِری آنکھوں سے نظر آتے ہیں

گردشِ وقت کی فطرت میں نہیں ہے رکنا پاس تُو ہو تو مہ و سال ٹھہر جاتے ہیں

تو کہ ہے شارحِ اسرارِ گراں بارِ حیات صورتِ جُہدِ مسلسل ترا ہر دن تری ہر رات

ہے محبت ترا لہجہ تو ہدایت تری بات تو کہ اس گھر کا مسیحا ہے، محبت تری ذات

ہم نے جو خوبی ِکردار و عمل پائی ہے تیری گفتار سے کردار سے سب سیکھا ہے

جو بھی نا خوبِ عمل، داغِ قبا میرا ہے وہ فقط میرا ہے میرا ہے فقط میرا ہے