امی کے لیے

ایک اک زخم ہرا ہوتا ہے ہر سال مرا مرے احساس کا ہر سال لہو ہوتا ہے

تیری آواز، تری یاد بہت آتی ہے اور آنکھوں کے جھروکوں کا وضو ہوتا ہے

درد اُٹھتا ہے، یہی درد دوا بنتا ہے وقت چپ چاپ کھڑا اشک مرے گنتا ہے

سینۂ ہست میں دل نوحۂ جاں سنتا ہے ایک ایک سانس بڑے پیار سے غم بنتا ہے

تو نہیں ہے تو کوئی میرا شناسا ہی نہیں کوئی اس دل کی حقیقت کو سمجھتا ہی نہیں

محرمِ شوق و وفا کوئی نہیں ہے تجھ بن ہاتھ خالی ہے مرا، تنگ زمیں ہے تجھ بن

مرے جذبات پہ بس برف جمی ہے تجھ بن ہاں محبت کی بہت زیادہ کمی ہے تجھ بن

ہم نَفس ہیں تو سہی غم کو مٹانے والے تو نہیں اُن میں مگر چھوڑ کے جانے والے

تیری صورت مرے سینے میں نہاں رہتی ہے تو خدا جانے تہِ خاک کہاں رہتی ہے

تو سدا شاد رہے، آہ! جہاں رہتی ہے تیری بخشش کی دعا وردِ زباں رہتی ہے

ایک قندیلِ وفا تو نے جلائی گھر میں رونقِ بزمِ جنوں تو نے سجائی گھر میں