دشت کی ویرانیاں ہیں ہمسفر کوئی نہیں

دشت کی ویرانیاں ہیں ہمسفر کوئی نہیں اس اندھیری رات کی شاید سحر کوئی نہیں

کس پہ دستک دو گے آکر اے مرے پیارے حبیب میرے گھر میں درد ہے دیوار و در کوئی نہیں

حُسن کی اس چاندنی پر یہ تکبّر کیا ہوا یہ تو اُس کی دین ہے تیرا ہُنر کوئی نہیں

وہ نہیں تو زندگی بے رنگ ہے بے کیف ہے تشنگی ہے دھوپ ہے، سر پر شجر کوئی نہیں

ہاتھ پر مہندی لگا لے ضد کی عادت چھوڑ دے دیکھ میرے پاس اب خونِ جگر کوئی نہیں

وہ دیا روشن کرو جس سے جلیں لاکھوں چراغ ورنہ گردُوں پر کہیں شمس و قمر کوئی نہیں

جابجا بکھرے ہوئے ہیں بے کفن لاشے مگر میں غلام اس کا مجاؔہد جس پہ سر کوئی نہیں