یہ کسی کی زُلفِ دراز تھی جو مرے گمان پہ چھا گئی

یہ کسی کی زُلفِ دراز تھی جو مرے گمان پہ چھا گئی مری جستجو ہی کچھ اور تھی مجھے اور دنیا دکھا گئی

تجھےنورِصبح کا واسطہ مرے آنسوؤں کو چراغ دے کہ سکوتِ شب کی ہر اک صدا مرے دھڑکنوں میں سما گئی

یہ اجاڑ بستی کے باسیوں کے گلاب چہروں کو کیا ہوا کہیں آندھیوں میں ردا گری کہیں دھوپ چہروں کو کھا گئی

پسِ مرگ مجھ کو بھلا دیا، مِرا نام نقشہ مٹا دیا کہ صدائےگریہ و شور میں تجھے نیند رات کو آگئی

یہ عجیب شامِ وصال ہے نہ خوشی نہ کوئی ملال ہے کہ گزشتہ سالوں کی بے حسی مِری عادتوں میں سما گئی

تری آرزوئے جمال نے تری سادگی کو مٹا دیا مِری شاعری بھی کمال ہے مجھے آئینہ جو دکھا گئی

یہ جو شہرِ آس اجڑ گیا یہ درِ امید نہیں رہا ذرا سوچنا کہ یہ کیا ہوا کہاں راہ و رسمِ وفا گئی

ترے فراق میں تڑپیں تجھے خبر بھی نہ ہو کہ تجھ کو ڈھونڈنے نکلیں تجھے خبر بھی نہ ہو

خدا کرے کہ تری آنکھ کے سبھی آنسو ہماری آنکھ سے برسیں تجھے خبر بھی نہ ہو

خدا کرے کہ طلسمات ِشوقِ روح ِبشر تری بھی روح میں اتریں تجھے خبر بھی نہ ہو

میں اپنے اشک جو لوگوں کے سامنے رکھ دوں بہت سے جان سے گزریں تجھے خبر بھی نہ ہو

یہ تیرا حسن سلامت بس اک جھلک کے لیے بہت سے راہ سے بھٹکیں تجھے خبر بھی نہ ہو