میں نے غزل میں گریہ و نوحہ نہیں رکھا

میں نے غزل میں گریہ و نوحہ نہیں رکھا دل رکھ دیا ہے درد کا دریا نہیں رکھا

روتی رہی ہیں بزم میں کل رات بےتکان آنکھوں نے دل کے حال کا پردہ نہیں رکھا

نقش و نگار گھر کے بہت خوب ہیں مگر یہ کیا کہ اک درخت کا سایہ نہیں رکھا

بس اختیارِ مہلتِ ایام دیکھ کر میں نے کبھی نگاہ کو اونچا نہیں رکھا

خود ہی بچو، سنبھل کے چلو، جو بھی ہو کرو حق نے تمھارے حسن پہ پہرا نہیں رکھا

گزری ہے مجھ پہ جو بھی مگر میں نے آج تک خود کو ترے خیال سے تنہا نہیں رکھا