میرے ادراک کے زخموں سے لہو رِستا ہے

میرے ادراک کے زخموں سے لہو رِستا ہے لفظ لکھتے ہوئے روتا ہے، قلم روتا ہے

جو غریبوں نے دیے گھر میں جلا رکھے ہیں ان چراغوں سے بھی حسرت کا دھواں اٹھتا ہے

تشنگی شوقِ زلیخا کی بھی دکھ دیتی ہے قید میں یوسفِ کنعان پہ بھی دل دکھتا ہے

تو مناجات کی تاثیر میں تعجیل نہ ڈھونڈ عمر لگتی ہے کہ قطرہ جو گہر ہوتا ہے

بےحسی دکھیئے اس دور کی ہر ساعت میں پھول جلتا ہے مگر باغ ہرا رہتا ہے

ہے عجب حسنِ مسیحائی میسر مجھ کو تیرے ہونے سے مرا درد بھی تھم جاتا ہے