صحرا ہے اور ہم ہیں شجر کی تلاش میں

صحرا ہے اور ہم ہیں شجر کی تلاش میں اور دل میں اک دعا ہےاثر کی تلاش میں

میں نے تو اس کو صرف دکھایا تھا آئنہ خنجر بکف ہے وہ مرے سر کی تلاش میں

منزل کی جستجو میں زمانے گزر گئے گھر سے چلا تھا میں ترے گھر کی تلاش میں

صورت گری کے حسن سے آباد ہے جہاں نکلا ہے شوق اس کے ہنر کی تلاش میں

اس ابتلاء کے دورِ قیامت میں دوستو انسان ہے سکوں کے نگر کی تلاش میں

مشکل میں غم گسار بھی کیسے دکھائی دیں آنکھوں پہ خواہشات کے پردے دکھائی دیں

اے خاکِ ارض پاک یہ سورج کی روشنی تجھ پر پڑے تو خون کے دھبے دکھائی دیں

احساسِ احترامِ بشر پر لکھیں کتاب اور در بدر غریب کے بچے دکھائی دیں

اب انتظارِ نورِ سحر کیوں نہیں رہا کیوں ذوقِ چشمِ یار پہ پردے دکھائی دیں

کس درجہ ہم یقین کی دولت سے دور ہیں رستہ نظر نہ آئے تو رستے دکھائی دیں